|
Eilieraštē
Anglickis Stasīs
2006 m. sueit 70 metu kāp Šiauliūs i
pėrmouji sovažiavėma (kongresa) sosėrinka žemaitiu rašītuojē. Tou
kongresa organizava Šiauliūs muokītuojo dėrbės, Lietovuo jau žėnuoms
poets Anglickis Stasīs, katros spaudā parengė ėr pėrmoujė Žemaitiu
rašītuoju kūrības antuoluogėjė Žemaičiai (išleista Kaunė 1938 m.).
S. Anglickė arkīvė, katrou ons bova
patėkiejės literatūruoluogou Pakalniškiou Ričardou, īr nedėdėlis
sāsiovėnielis, katramė pabėrūs lapeliūs sorašītė patis žėnuomiausė anuo
žemaitėškė eilieraštē: Truobalė pri opės, Vėnta, Pošelė, Atmėnėmā,
Rogė gīvenėms, Kenstoutė. Karto so anās īr ėr trīs eilieraštelē,
katrėi lig pat šiuol mažā kam bova žėnuomė. Anus, tēp pat ėr kėik
daugiau žėnuomus Atmėnėmus, pateikam skaitītuojems.
|
- Dvė vasaras
-
- Par sužīdosės pėivas
- Vasara brėda,
- Vuo bėtelės žuolīnūsė ronkiuojė medo.
- Vedo
- Ejuov par karklās prižielosė lonka,
- Pasėjiemė vėins kėtam už ronku.
-
- Gailē sklēdė aplinkou
- Marėnonti kvapa
- Ėr karklīna žvėrblelē
- Skombiejė tarp lapu.
- To šnekiejē,
- Šnekiejē karštā aple meilė,
- Širdi ruovė iš kūna ba peilė.
-
- Ėr sakē mon
- Gīvensma, uogelė, kap ruojou!
- Lėpsma,
- Rėsmuos aukštīn
- Kap tėi apīnuojē.
- Ėr truobalė.
- Truobalie vākū mas turiesma.
- Ėr vargelė.
- Jouda vargelė
- Tėkrā neregiesma!
-
- Širdi.
- Širdi uns sakė,
- Aš tau neuždouso!
- Je nuoriesi,
- Ėr asla aš pats iššlouso!
- Šimta kartu bučiouso
- Meilingā par dėina,
- Bus gerībės vėsuokės kap šeina!
-
- Laukiau vėinus,
- Ontrūsius metus
- Ėr tėkiejau.
- Ėr par longa longieli
- Kap gorčės veiziejau.
- To, važioudams pru šali,
- Vės šelmėškā muojē,
- Sava pažadus dar ba karštesnius
- kartuojē.
-
- Lig tuo ruojaus
- Mažā jau, kāp sakē, batrūka!
- Toukart vėiškelē mūsa šalelės aprūka.
- Jiemė anon
- Idiejė i mašina žalė
- Ėr idiejė išdūmė i svetima šali.
-
- Saulės nier.
- Kiaurus metus tėn napatek!
- Vuo puo truobas
- Valkiuojės bads ėr vargs tik.
- Žmuonis tėn
- Tēp sulīsa, nuplėka, vėinas žiaunas
- Er bornun skīlelės balėka.
-
- Vasara atbrauk apėnt
- Par padvesintas pėivas,
- Kap pablūdosės kraipuos
- Baltā krakmuolītas ėivas!
- Kas gīvs, galis
- Linksmėnas, sokas ėr džiaugas.
- Mon tik vėinā nalinksmo ba drauga.
-
- Nieks kap toukart
- Jau monės napalīd par lonka,
- Nieks liūdnās vakarās naaplonka.
- Kiūtau vėina pati
- Pri užžielosė taka,
- Nieks meilingu žuodieliu nabsaka.
-
- Alksnīnielis, 1942 m. lėipas 5 d.
|
- Vaikē
-
- Ejė vaikē patuorēs, patuorēs,
- Kaišė rūtuoms keporės, keporės.
-
- Kaišė rūtuoms keporės, keporės,
- Gaudė sava mergelės, mergelės.
-
- Gaudė sava mergelės, mergelės,
- Spaudė plėina strielbelės, strielbelės.
-
- Spaudė plėina strielbelės, strielbelės,
- Goldė priešu eilelės, eilelės.
-
- Mergės
-
- Līn līn ėr līnuo,
- Vėsas mergės lėinėinuo.
-
- Raun geltuona lėna,
- Kas dievies, nažėna.
-
- Lėna raun kap vaška,
- Ronkuoms rasa taška.
-
- Raun, joukū nadara,
- Lek už bara gala.
-
- Bornas deg rauduonā,
- Lonkstuos dailė šuonā.
-
- Līn, līn ėr līnuo,
- Vėsas mergės lėinėinuo.
-
- Atmėnėmā
-
- Ožmėrštė negalio truobalės dūmu,
- Kor vākpalaikio būdams aš kruokiau,
- Ėr tun žaliun, žaliun pakrūmiu,
- Kor būdas iš šaknun statiau.
-
- Ėr varlės pelkiesė pavasarēs tėn korkė,
- Ėr kelnės atsėraitė gondrā anas gaudė.
- Vėsuokēs vabalās krebždiejė tėn doborkē,
- Vėsuokēs paukštēs čiorškava pašlaitē.
-
- Vuo laumės vakarās tėn skalbė žlugti,
- Kor dėina muotrėškas jierātius trinka,
- Mas liūbam skubintėis pro šali smoktė,
- Ka mumis so jierātēs naištrinktom.
-
- Žemaitiu krašta apgamas er dvesas
- Šėrdie pasėlėikt naišdėlduomas,
- Nors būtumi atmėnėmus užgesės
- Ėr pasaitus nutraukiuojės, svetur iškėldams.
-
- Ėr mon vės dar atsėlėip padavėmā
- Aple gerībiu gruobstītuojė ronka,
- Ėr mon dar tabvažiou ognėis vežėmā
- So raganuoms er aitvarās par lonka.
|
